O CAMIÑO DOS FAROS

200 quilómetros, a pé mormente polo litoral, entre a vila de Malpica e o cabo de Fisterra- é unha experiencia intensa de beleza. Dunha beleza primordial, filosófica: andando refacemos, volvemos a pisar, o camiño dos primeiros filósofos: Tales, Anaximandro, Anaxímenes, Empédocles, Heráclito, Parménides. É o encontro cos catro elementos, que eles sinalaron como o principios da natureza, do existente, do que hai: auga, ar, terra e fogo. Pois, xunto co océano (auga) e o litoral (terra), o vento (ar) e o sol (fogo), protagonizan tamén o camiño: unha liña, minúscula e infinita, que os une (que reúne eses catro elementos) nunha experiencia única.